08/09/2026
تربت کو مجموعی طور پر یرغمال بنایا گیا ہے، سیاسی کارکنوں کو بھرپور جدوجہد کرنا ہوگی: ڈاکٹر عبدالمالک بلوچ
تربت: نیشنل پارٹی کے رہنما اور سابق وزیراعلیٰ بلوچستان ڈاکٹر عبدالمالک بلوچ نے کہا ہے کہ تربت میں خوف و ہراس کی صورتحال کے خاتمے کے لیے سیاسی کارکنوں اور تمام سیاسی جماعتوں کو بھرپور جدوجہد اور احتجاج کرنا ہوگا۔
تربت میں خطاب کرتے ہوئے ڈاکٹر عبدالمالک بلوچ نے کہا کہ جن افراد کو ٹیلیفون کالز موصول ہو رہی ہیں، وہ خوف سے باہر نکلیں اور کھل کر اس صورتحال کے بارے میں بات کریں۔
انہوں نے کہا کہ سرفراز نامی شخص کو مبینہ طور پر تین مختلف نمبروں سے ٹیلیفون کالز موصول ہوئیں، جن میں ایک فلپائن، ایک لندن اور ایک سنگاپور سے تھی۔ ان کا کہنا تھا کہ ایک معمولی میڈیسن کا کاروبار کرنے والے شخص کا کیا قصور ہے کہ اسے اس طرح کی کالز موصول ہو رہی ہیں۔
ڈاکٹر عبدالمالک بلوچ نے کہا کہ جسک میں بھی ان کے دوستوں کے گھروں اور دکانوں کو مبینہ طور پر لوٹا گیا، جبکہ تربت بازار میں بھی لوٹ مار کے واقعات پیش آئے ہیں۔ "ہم سمجھتے ہیں کہ تربت کو مجموعی طور پر یرغمال بنایا گیا ہے،" انہوں نے کہا۔
انہوں نے کہا کہ موجودہ صورتحال میں بحیثیت سیاسی کارکن سب کو اٹھ کھڑا ہونا چاہیے اور احتجاج کرنا چاہیے۔ احتجاج کی مختلف صورتیں اختیار کی جا سکتی ہیں، جن میں شٹر ڈاؤن، جلسہ جلوس اور دھرنا شامل ہیں، جبکہ آل پارٹیز اجلاس میں آئندہ کے لائحہ عمل کا فیصلہ کیا جائے گا۔
ڈاکٹر عبدالمالک بلوچ نے کہا کہ اگر روزانہ اسی طرح بڑی تعداد میں لوگ اپنے حقوق کے لیے کھڑے ہوں تو اس میں بڑی طاقت موجود ہے اور عوامی احتجاج کے ذریعے مسائل کے حل کے لیے دباؤ بڑھایا جا سکتا ہے۔
انہوں نے مزید کہا کہ تربت کے عوام اور تمام سیاسی جماعتوں کے سینیئر رہنماؤں کو موجودہ صورتحال کا سنجیدگی سے جائزہ لینا ہوگا اور "یلغاری کو بھی توڑنا پڑے گا۔"
ان کا کہنا تھا کہ اگر کراچی جانے والی شاہراہ بھی بند رہی تو صورتحال مزید سنگین ہو سکتی ہے، کیونکہ مبینہ طور پر ایمبولینسیں مریضوں اور میتوں کو لے جانے کے لیے بھی تیار نہیں، جس سے عام شہریوں کو شدید مشکلات کا سامنا ہے۔
ڈاکٹر عبدالمالک بلوچ نے کہا کہ موجودہ صورتحال میں بھرپور سیاسی و عوامی جدوجہد کی ضرورت ہے اور تمام سیاسی جماعتوں کے سینیئر رہنماؤں کو مل کر اس مسئلے کے حل کے لیے کردار ادا کرنا چاہیے۔
آخر میں انہوں نے مختلف سیاسی جماعتوں کے رہنماؤں اور کارکنوں کا شکریہ ادا کرتے ہوئے کہا کہ تفصیلی مطالبات بعد ازاں پریس کانفرنس میں پیش کیے جائیں گے
#ڈاکٹرعبدالمالکبلوچ #تربت #بلوچستان ۔
