29/07/2026
ဒီညတော့ စာလေး ရှည်ပါမယ်နော် 😥
မေဂိုး ဒီရက်အတွင်း စိတ်ဓါတ်တွေလဲကျသလို တော်တော်လေးလည်း စိတ်မကောင်းဖြစ်နေတာ ၇ လပိုင်း ၂၁ ရက်နေ့ CT Scan အဖြေထွက်ပြီးကထည်းက down သွားတာ ဒီနေ့အထိပါဘဲ ၊ မေဂိုးရဲ့ ကံကလည်း ဆိုးလိုက်တာကွယ် ၊ ကီမို ၆ ကြိမ် သွင်းပြီးလို့ ပြန်စစ်တော့ အဆုတ်ကနေ အသည်းကို ပြန့်နေပြီး အသည်းအောက်နားလေးမှာ အကျိတ်တွေ့လို့ နောက်ထပ် ၃ ကြိမ် ဆေးပြောင်းပြီး ကီမိုထပ်သွင်းတယ် ၊ စုစုပေါင်း ၉ကြိမ်ပြီးလို့ CT Scan ပြန်ရိုက်တယ် အသည်းရဲ့ ဘယ်ရော ညာရောမှာ အကျိတ်တွေက ပြန့်နေတယ် ၊
အကျိတ်အရွယ်အစားတွေက နှစ်ဖက်စလုံးမှာ 10 cm ကျော်နေတာမို့ ခွဲထုတ်လို့ရတဲ့ အခြေအနေ မဟုတ်တော့ဘူးပေါ့ လက်ရှိ ခံစားနေရတဲ့ နာကျင်မှုတွေကို မခံစားနိုင်တော့ဘူး ကင်ဆာဆရာဝန်ကြီးကတော့ အသည်းကို ဆေးဖြန်းမယ်ပြောပါတယ် ခုလာမဲ့ ၇ လပိုင်း ၃၁ ရက်နေ့ ရက်ချိန်းပြရမဲ့နေ့မှာ ဆရာကြီးက ဘာတွေညွှန်ကြားမလဲ ဘာတွေဆက်လုပ်ရမလဲ ဘယ်လိုတွေ ဖြစ်မယ်ဆိုတာ မေဂိုးလဲ မပြောပြတက်တော့ပါဘူး
အခုချိန်မှာ မိသားစုတွေအားလုံး ရှေ့လျှောက် ဘာဆက်လုပ်ရမလဲ ဆိုတာကိုဘဲ ခေါင်းချင်းဆိုင် ဆွေးနွေးနေရပီ ၊
ကဲ အဲတော့ မေဂိုးက သမီး ၃ ယောက်ကိုမေးတယ် ၊ အကယ်၍များ မေမေသာ တစ်စုံတစ်ခု ဖြစ်သွားခဲ့မယ်ဆိုရင် ဒီဂေဟာကို ဘယ်လိုရှေ့ဆက်ကြမလဲ ဘယ်လိုဦးစီးကြမလဲ ဘယ်သူ့ကို လွှဲပေးချင်ကြလဲ ၊ သမီးတို့ ဆန္ဒ ဘယ်လိုရှိလဲ အမေသိပါရစေလို့ မေဂိုးမေးတယ်
သမီးတွေ ပြန်ပြောတဲ့စကားကို ကြားလိုက်ရတဲ့အချိန်မှာ မေဂိုးရင်ထဲ အတော်လေးကို ဝမ်းသာကြည်နူးမိပါတယ်
သမီးတွေက ဘာပြန်ပြောလဲဆိုတော့
" ဒီခြံကို အမေကိုယ်တိုင်ဦးစီးပြီး အခက်အခဲတွေ အများကြီးကြားထဲက တည်ဆောက်ထားတာ ၊ ဘဝတွေ အချိန်တွေ ငွေတွေ ပေးဆပ်ခဲ့တာ နည်းသလား အမေရယ် ၊ အခုချိန်ကျမှ သမီးတို့က ဘယ်သူ့ကို လက်လွှဲပေးရမှာလဲ ၊ မျက်နှာလွဲ ခဲပစ် ဘယ်သူ့ကိုမှ မလုပ်ရက်ပါဘူးအမေ ၊ အဲတော့ မေမေစိတ်ချပါ မေမေ့ ကျန်းမာရေးကိုဘဲ ဂရုစိုက် ၊ ဒီကလေးလေးတွေရဲ့ ထွက်သက် နောက်ဆုံးအချိန်အထိ သမီးတို့တွေကဘဲ အားလုံးကို တာဝန်ယူပီး ဆက်လုပ်ပေးသွားမှာပါ " လို့ ပြန်ဖြေပါတယ် ၊
ကလေးတွေကို ဆက်လက် ပြုစုစောင့်ရှောက်ပေးဖို့အတွက်က မေဂိုးစိတ်ချသွားပါပြီ၊
မေဂိုးရဲ့ အလှူရှင်များကို မေတ္တာရပ်ခံချင်တာကတော့ မေဂိုးသာ တစ်ခုခုဖြစ်သွားခဲ့ရင် ဒီ ကလေးလေးတွေရဲ့ ဘဝသက်တမ်းစေ့ အေးချမ်းစွာ နေထိုင်စားသောက်နိုင်ဖို့အတွက် လစဥ် လှူဒါန်းပေးလျှက်ရှိသော အလှူရှင်များ ၊ တိချစ်သူ အလှူရှင်များက ဆက်လက်ပြီး ဝိုင်းဝန်းကူညီ လှူဒါန်းပေးကြပါဦးနော် ၊ ကလေးတွေအတွက် လှူဒါန်းပေးသော အလှူငွေများသည်လည်း ကလေးတွေအားလုံးအတွက်သာလျှင် ဖြစ်စေရမည်ဆိုတာ မေဂိုးရဲရဲကြီး အာမခံပါတယ်၊
မေဂိုးကတော့ မလျော့သော ဇွဲ ၊ အားအင်အပြည့်နဲ့ ဒီ ကင်ဆာရောဂါဆိုးကြီးကို ဆက်လက်ပြီး တိုက်ပွဲဝင်ရပါဦးမယ်
မေဂိုးကိုလဲ ဆုတောင်းပေးကြပါဦးနော် ၊ အားလုံးရဲ့ မေတ္တာဓါတ်ကိုလဲ ခံယူပါရစေနော် 🙏🙏🙏
