Vodka & I "فودكا وأنا "

13/09/2026

النهاردة أدركت ان من عمري قضيت ١٤ سنة و ٨ شهور في حياة ڤودكا، كلبة جولدن صاحبة وزن و دماغها بتاعتها، بتسمع الكلام، غالبا بس متأمنلهاش، عندها احتياجات؟ يووه كتير، حضورها قوي؟ جدا جدا... حتي و هي عجوزة و اغلب الوقت مش عايزة تعمل مجهود لأنها ببساطة مبقتش تقدر...
الحقيقة بدنيا الجولدن مجهود حتي و ان ڤودكا كانت كلبة هادية و رايقة نسبيا، ماديا كمان محتاجة ميزانية خصوصا لو محظوظين زي و الكلب كبر و قضي عمر معاكم، صحيا لازم عينيك في وسط راسك لإنهم بيطلعوا أي حاجة و كل حاجة بالنسبة لهم مغرية و الله اعلم الاي دخل بقهم كان ايه و كان فين قبل كده...غير بقي شوية مشاكل لو مش بتعتني بيهم بشكل سليم في الجلد و الودان و العضم و حتي لو بتعتني بيهم كويس برضه بتحصل و اي علاج ليهم اضرب في وزنهم، هتقولولي كل الكلاب طفسين هقولكم لا الجولدن غير غير غير و ڤودكا أصلا في حتة تانية غير باقي الجولدن...
عايزة تقولي ايه؟ عايزة أقول ان كلبك رفيقك، طاقة حلوة في حياتك لكن عليك ليه حقوق كتير لو مش هتقدر عليها يبقي بلاش، هنا في أسبانيا الكلاب اللي بتتساب في الشارع كتير عشان الناس جابت كلب و بعدين اكتشفت انه كائن حي ليه متطلبات فاسهل حاجة خصوصا وقت الاجازات اللي بيتطلب تحضيرات، بيستخسروا و بيقولك ليه التعسيف...يقفوا علي جنب الطريق السريع و يسيبوهم و يجروا بالعربية.
الكلب مش حاجة تجيبها تسد فراغ، الكلب هيغير حياتك و اختياراتك و ان مكنتش ناوي يبقي بلاش تبهدل كائن حي معاك و بالاخص ياريت بلاش نجيب جولدن و احنا مش فاهمين المساحة إللي هيحتلها في بيتك و حياتك...
#حياةكلب #مذكراتنا #مهم #الوقت

30/07/2026

بقالنا كتير مكتبناش أصل الفترة اللي فاتت عملنا حاجات كتير جالنا صحاب و سافرنا و عيينا و عيينا و سافرنا و جاتلنا صحاب تاني و عجزنا سنة كمان بس لسه الشهية مفتوحة و المزاج عال.
هنشارك مقتطفات من الفترة اللي فاتت بس نقجر نقول ان أنا و ڤودكا بقي عندنا قبول عام ان أهم حاجة بعد ١٤ سنة و ٧ شهور في الدنيا هي ان الفودكا تبقي عندها جودة حياة، غير كده كله في ايدين اللي خلقنا، ممنونين و مبسوطين.
#ممنونية #مذكراتنا

15/03/2026

05/01/2026

استقبلنا سنة جديدة و كمان ٢٠ يوم هنحتفل بعيد ميلاد ڤودكا ال١٤ اذا ربنا ادانا عمر...الحقيقة بقالي بتاع ٤ شهور بقول اننا داخلين علي ال١٤ ماهو نعمة كبيرة وجودها معانا في المطلق و ان ربنا مديها عمر بعد ما كانت هتروح مننا شهر فبراير اللي فات. أنا كمان حابة أقضي معاها وقت أكتر عشان تفاصيلها بقت كتير و هي الحقيقة دمها خفيف و عشان بقت متعلقة أكتر بوجودي جنبها زي الناس الكبار أظن ...
كمان الصحة الجديدة دلوقتي معناها اننا بنتحرك و نفسنا مفتوحة و بنروح للدكتور كل شهر علي حاجات خفيفة كده و العلاج الطبيعي مرتين أو مرة في الشهر، لحد ١٠ سنين صحة حلوة يعني مبنشوفش الدكتور أكتر من مرتين في السنة واحدة تطعيم و التانيه حاجة خفيفة كده: عضة، وجع بطن، قرصة حشرة...
صحة جيدة معناها إن معندناش علاج غير أقراص عشان متسربش بعد ما تعمل بيبي.
صحة كويسة يعني بتنام اغلب اليوم، صحة كويسة يعني لما بتجري بتدلق علي وشها بس بتعرف تقوم أو بتمسك نفسها بعد ما أقومها. لكن الأهم إنها مبسوطة و مرتاحة و نفسها مفتوحة و بتعمل زفة كل مرة بنحط فيها أكل...
نشكر ربنا علي ١٤ سنة إلا ٢٠ يوم مع الوش السمح ده!
#قمر١٤ #الحب #مذكراتنا #نعمة #ممنونة #قلبي

24/12/2025

معلش بتأخر عليكم، بس الوقت بيجري و الدنيا مجنونة و بنفضل نقضيه في الشمس و الهوا و سنكحة في التيراسات و الشيرينجيتوهات (الاكشاك يعني) و البارات عشان الطفاسة...
كنت كتبت عن العلاج الطبيعي فارق معانا كتير، بقينا نمشي لحد ما ضوافرنا جابت دم تاني، من سنتين كنت هقريف لكن المرة دي كنت عارفة هعمل ايه و جزء مني كان مبسوط اننا رجعنا نمشي للدرجة دي...
كمان شهر بالظبط الحلوة هتكمل ١٤ سنة و أنا ممنونة لكل يوم حلو بيعدي علينا.
من موقعنا هذا بنقول العيشة مش سهلة لكن لذيذة، حب و انبسط و ارتاح و نام و اتسامح و حب و الدلع زي فودكا كده!

11/07/2025

الحركة بركة و العلاج الطبيعي نعمة من عند ربنا...من كام شهر ڤودكا كانت بتروح مني، و قامت من وعكتها و ردت فيها الروح لكن رجلها اللي ورا كانت تعبانة جدا و كنا عايشين علي كورتيزون واحدة واحدة اتحسنت و قللنا الجرعة كتير لكن كان فيه حاجات مبقيناش قادرين عليها: دخول العربية بقي قطمة وسط بالنسبة لي لأنها مش شايلة نفسها، منقدرش نطلع سلالم، نزول السلالم كعبلة، و التمشية للقرية اللي جنبنا بقي حاجة منقدرش نعملها كتير زي الاول. كمان بقي لازم نعمل زيارة شهرية للدكتور...
أنا قلت حقها كبرت و تعبت و وقت ندلعها المهم تكون مبسوطة، لكن مكانش عاجبني اننا معتمدين علي الكورتيزون. المهم سألت دكتورتنا علي حد بيعمل علاج طبيعي فقالتلي فكرة هايلة، محدش بيقترح الموضوع ده لإنه مكلف غالبا بس يستاهل الحقيقة...
ڤودكا رجعت شباب، يعني مش قوي بس رجعت بنت ١١ و نص بدل ١٣ و نص، بنطلع سلالم و ننزل بسهولة بقت بتثبت و تعافر و تطلع لوحدها العربية بزقة بسيطة، بتعمل ٢٠ دقيقة في المية و بنمشي للقرية اللي جنبنا، اللي هو ٢،٥ كيلو رايح جاي و ترجع مش مهدودة زي الأول و تاني يوم ننزل البيسين المحندق ده و نعمل ٢٠ دقيقة كمان عالمشاية و نطلع و ننزل من العربية من غير ماكسر ضهري...
أنا مبسوطة، تعبنا في الأول و طلعت روحي رايح جاي مرتين في الاسبوع بس النتيجة شبه سحرية و قدرنا نقلل الجرعة تاني و لو فضلنا حلوين للشهر الجاي بعد ما نقلل جلسات العلاج هنبطل كورتيزون...ادعولنا كده.
#مذكراتنا #بنعافر #بنتعافي #قردة #كلبةجولدن #عجزنا

15/03/2025

لزوم المرحلة عشان ميجيلناش اكتئاب من زهق اننا بنعمل نفس الخطوتين إللي بنمشيهم حوالين البيت، الحقيقة العربية دي أمتها طاقة حلوة و شجعتنى تمشي اكتر كتير و تروح حتت جديدة و ترجع لهوايتها في النبش علي الرملة و التدوير علي طرح البحر سمكا كان أم بتشنجان...
#مرقعة #مسنة #عجزنا #ذكرياتنا #لحظات #مذكراتنا #الحب #مشاوير

02/03/2025

الحياة بقت أبطأ شوية بالنسبة لڤودكي أو ڤودكيتا أو كوكو أو ڤدڤد يعني زي ما أي حد يحب ينده عليها...
محتاجين نريح كل نص دقيقة بس لما بنقوم بنخرج و نجري، صحيح بنجري أقل من ١٥ ثانية بس مش مهم، ليه ما نستمتعش بالريتم الهادي الرايق مادام مبسوطين.
فيه حاجات عملية ابتدينا نعملها عشان حياتنا تبقي أسهل، يعني جبنا هارنس مغطي البطن و الضهر عشان نعرف نساعد و نشيل بسهوله لو احتاجنا، كمان فيه حزامين عشان يمسكوها من عند الوراك عشان تبقي مسكة محكمة، كل مرحلة و ليها عدتها. الحقيقة متخيلتش إنه هيخفف تقلها بشكل كبير كده، صحيح أهم من الشغل تظبيط الشغل.
#مذكراتنا #حبي #مرقعة #عجزنا #سندونا

28/02/2025

إمبارح كان يوم عصيب، تاري قلق ڤودكا و تعبها مكانش بس بسبب التهاب الرئة، لكن كمان غضاريف العمود الفقري بقوا عاملين زجزاج بشكل ضاغط علي الاعصاب و مسبب عجز في الرجلين إللي ورا. إمبارح الصبح ده بان بشكل واضح و الحلوة بتفطر فجأة رجلها وقعت و عملناها علي روحنا، اتكسفت و نفسها اتصدت و وقعت علي الارض...
بالنسبة لي ده كان نذير بداية النهاية، روحنا لدكتورتها و عملت الأشعة و اتأكدنا إن دي المشكلة و مش بس مأثرة علي رجلها اللي ورا كمان اللي قدام بقول اضعف ، الحقيقة هي محاولتش تخبي لكن قولتلي بالطف شكل ممكن إنها هتحاول مرة كمان تديها حقن كورتيزون و ڤيتامينات بس لو فضلت كده هيبقي أحسن نريحها، الموضوع ده كان معذبني مش بس عشان الفراق صعب بس عشان قرار إني انهي حياة ڤودكا شبه مستحيل...
إتفقت معاها لو عايزة تمشي، تمشي لكن لو هتعافر هعافر معاها، مخيبتش، ابتدت تاكل و تشرب بنفس، عينها روقت و نورت، حبة حبة خدت خطوة، و بعدين ٥...كلن غنينا ميعاد دكتور عشان نأخد القرار لكن فاجأتنا الحلوة بعد ما شيلناها نزلناها في الشارع، انها جريت عالبحر، آه كنا مساعدينها و اه كان مجهود بس عافرت و في العيادة ادونا حقنة كمان ڤيتامين و كورتيزون و هنكمل علي الانتيبايوتك و الكورتيزون و نشوف، النهاردة ڤودكا عفتني من قرار مستحيل و كسبنا يوم جديد سوا، بكره منعرفش هتكمل قد إيه بس مش مهم المهم ان طول ما نفسها مفتوحة هنعمل كل اللي نقدر عليه عشان تبقي مرتاحة لحد ما ربنا يقرر إن كده كفاية...الفيديو ده بعد ما أكلت وجبتها المفضلة من ٥ دقايق.
#مذكراتها #العجز