05/08/2026
3 أيام بتصارع علشان تولد... لكن الحقيقة كانت أقسى من كده.💔🐱
القطة الجميلة دي عمرها 9 شهور ووزنها كيلو ونص بس.
للأسف حصل حمل من قط أكبر منها بكتير في الحجم، وجسمها الصغير مقدرش يتحمل الحمل ولا حجم الأجنة.
فضلت 3 أيام كاملة بتحاول تولد، وأصحابها جربوا علاجات كتير، لكن بدون أي تحسن. كانت نفسها بالعافية، بطلت تاكل، وحالتها كانت بتسوء ساعة بعد ساعة.
أول ما وصلت العيادة عملنا سونار، وكانت الصدمة...
الأجنة كانت متوفية داخل الرحم وبدأت تتعفن، وده كان بيمثل خطر كبير على حياتها.
ماكانش فيه وقت للتأخير.
بدأنا فورًا بالمحاليل والعلاج اللازم لتثبيت حالتها، وبعدها دخلنا غرفة العمليات، وتم استخراج الأجنة وإنقاذ حياتها بفضل الله.
❤️ وبعد 10 أيام من المتابعة والعلاج، رجعت تفك الغرز، وترجع تاكل وتتحرك وتبقى زي الفل.
📢 رسالة مهمة لكل مربيين القطط:
تزويج القطة وهي صغيرة في السن أو من ذكر أكبر منها بشكل كبير ممكن يعرضها لمضاعفات خطيرة أثناء الولادة، وقد يهدد حياتها وحياة الأجنة.
ولو الولادة اتأخرت أو القطة فضلت تتعب وتحاول تولد بدون نتيجة، متستناش،التدخل البيطري السريع ممكن يكون الفرق بين الحياة والموت
