19/06/2026
اتفقنا ان فرد الحمام ٥٠% من ابوه و٥٠% من أمه...
يبقى أي معتقد قديم خاطئ ان الإنتاج بياخد من الاب اكتر ولا الأم اكتر... ولا يقولك البنات بياخدوا اكتر صفات من ابوهم والولاد من امهم.
مافيش منه الكلام ده... تمام؟
(العلم هوا الي بيقول كده... مش انا)
طب ماسئلتش نفسك يعني ايه ٥٠%؟
وهيا ال١٠٠% دي شكلها ايه؟
الكلمتين الي جايين دول هما الأساس الي هنبني عليه كل الي جاي... (((((ركز علشانك)))))
ال١٠٠% دي بتاعة فرد الحمام... العلم بيسميها...
(((((الشريط الوراثي)))))
الشريط ده فيه كل حاجه تخص (فرد الحمام)
كل حاجه حرفياً...
يعني شكله الخارجي... صفاته... قدرته على الطيران... قدرته على تحديد الاتجاهات في الجو... الريش طويل ولا قصير... ناعم ولا خشن... لامع ولا مطفي... مناعته قويه ولا ضعيفة... عصبي ولا هادي... كل حاجه كل حاجه بما تحمله الكلمة من معنى.
بعيدا عن المصطلحات العلميه الي ممكن تكون تقيله على مسامع الغير متخصصين في العلم....
تخيل معايا ان الشريط الوراثي ده عبارة عن عمارة كبيرة... برج مكون من ٢١ دور... كل دور فيه شقتين اتنين بس... إجمالي الشقق ٤٢ شقة.
(((((المثال ده هوا الي هنبني عليه كل كلامنا الجاي علشان اوصلك "الفكرة" من جدرها)))))
لما يجي الاب... (فرد الحمام الدكر) ينقل ٥٠% من صفاته الوراثية مع الحيوان المنوي... احنا كبشر موصلناش لحد انهارده لمعلومة (انهي ٢١ شقة من ال٤٢) الي هيتنقلوا؟؟؟؟
بس وصلنا لمعلومة مهمة جدا جدا جدا...
ان (لازم لازم لازم) من كل دور شقة واحدة تتنقل...
شقتين يتنقلوا من نفس الدور (مستحيل)...
دور كامل مايتنقلش منه ولا شقة (مستحيل)...
بس الدور الأول هيتنقل منه الشقة اليمين ولا الشقة الشمال... مانعرفش...
علشان كده بنقول بلغة (مش غلط ومش صح في نفس الوقت) ان هيحصل مرة ينقل الشقة اليمين وفي مرة تانية وتخصيب تاني ينقل الشقة الشمال.
يمكن تفهم دلوقتي ليه لما بتسأل على حاجه معينه في شكل الإنتاج والزغاليل هيكونوا ازاي بتسمع كلمة ٥٠/٥٠ او ١ من كل ٢.
الأم... (فردة الحمام النتاية) وهيا بتنقل ال٥٠% بتاعتها مع البويضة بيحصل نفس المبدأ...
من كل دور شقة...
فيما عدا جزئية بسيطه ومهمة (جدا جدا جدا) هنتعرض ليها بالتفصيل الدقيق قريباً لأهميتها القصوى.
الشريط الوراثي هوا مفتاح اللعبه كلها...
لو فهمته...
هتوصل لمرحلة أبعد بكتير من فكرة اللون وبس.
دانتا هتوصل لمرحلة انك بتستعمله علشان تنتج طيور تمتاز بالسرعة... أو قوة القدرة على تحديد الاتجاهات... أو ريش الجناح طويل... أو طيور مناعتها ضد الأمراض قوية.. وغيره وغيره... حتى اخواتنا الي بيربوا الحمام للمعارض ومسابقات "المواصفات" هتفهم من خلاله ازاي تظبط التفصيله المعينه الي عايز تحسنها في إنتاجك... أو هتفهم ايه الخطأ الي وقعت فيه وبسببه التفصيلة المعينة مش راضيه تظبط معاك.
كل ده جوا الشريط الوراثي.
للحديث بقية بإذن الله...
دمتم سالمين.
