17/06/2026
قال ﷺ: (يدخُل الجنّة أقْوام أفْئِدَتهم مِثل أفْئِدة الطَيْر) ❤️
الرحمة مش كلمة حلوة بنزين بيها الكلام
الرحمة امتحان من ربنا
واللي بيمد إيده على روح ضعيفة بالسم أو الضرب أو التحريض لازم يعرف إن الروح دي وإن كانت خرسا قدام الناس فربها سامع شايف عليم
ربنا بعت سيدنا محمد ﷺ رحمة للعالمين
مش رحمة للإنسان بس
ولا رحمة للي بنحبه بس
ولا رحمة وقت ما نكون فاضيين نحس
والنبي ﷺ قال
الراحمون يرحمهم الرحمن ارحموا من في الأرض يرحمكم من في السماء
وقال ﷺ
في كل كبد رطبة أجر
يعني شربة مية لكلب عطشان ممكن ترفعك عند ربنا
ولقمة لروح جعانة ممكن تكون سبب رحمة ربنا ليك
وفي نفس الدين
امرأة دخلت النار في قطة حبستها
لا أكلتها ولا سابتها تاكل من أرض ربنا
فإزاي قلبك يطاوعك تحط سم
إزاي تنام وإنت عارف إن في روح اتلوت من الوجع بسببك
إزاي تفرح في موت كائن كان كل ذنبه إنه جعان وخايف وعايش في شارع ملهوش غير ربنا
خاف من يوم الحساب
يوم ما تقف لوحدك
ومفيش صوت عالي ينفعك
ولا لايكات ولا تحريض ولا شماتة
وتلاقي قدامك روح ضعيفة بتشتكي لربها
ساعتها هتعرف إن الضعيف اللي محدش دافع عنه
كان وراه رب قوي لا ينام
ارحموا
قبل ما الرحمة تتمنع عنكم
وخافوا
قبل ما الخصم يبقى روح ما قدرتش تتكلم في الدنيا
بس ربها هينطق حقها يوم القيامة
