05/02/2022
السلام عليكم و رحمة الله و بركاته
نبدء بسم الله...
هنتكلم في موضوع شائع عن التدريب بين المربي أو الغاوي أو الهاوي في مجال تربية الكلاب في مصر بالاخص وان الخبرة تغني عن العلم في التدريب و هنا تبدأ المشكلة عن غير قصد أو عن الجهل بالشيء (مثال) أن حد مثلا يكلمني عن أنه عنده كلب محتاج يتدرب (طاعة) ويختصر الموضوع في كلمة طاعة من اكتساب الخبرة طبعا.
طيب هل حضرتك تعرف مراحل تدريب الطاعة ف يجاوب أن الطاعة عبارة عن شوية أوامر الكلب هينفذها.
طيب هل كلب حضرتك مؤهل يجاوب طبعا كلبي ذكي جدا هي كام حصه وانا متأكد أن كلبي يوصل لمستوي عالمي زي الي بنشوفه في الشوهات و المسابقات .
طيب حضراتكم كل الكلام ده (خــطـــأ)
١-درايڤ الكلب هو مستوي تركيزه مع الأشياء المحيطة بيه و دي حاجه سيكولوجية في الحيوانات عموما و بتختلف من فصائل لاخره أو نفس الحيوان و اخر و بترجع عموما في الكلاب لخط الدم و الجينات الوراثية لأهله مش أنه ذكي أو غبي ومن هنا بنقول أن مش كل كلب ينفع في كل حاجه وان كل كلب ينفع في حاجه معينة علي حسب احتياجات.
٢- تدريبات (انواع التدريب) أو (التدريبات عموما كلها) هي عبرة عن عدة مراحل تبدأ من اختيار الجرو و النوع المناسب لإحتياجاتك دي مراحله صعبة جدا تحتاج لعلم و خبرة يعني زي دراسه سلوكيات كل انواع الكلاب و البنية الأساسية للعظام و الصحة بشكل عام و اختبار الجرو الي يقدر يلبي احتياجاتك من تربيته.
٣-(التأهيل) وهو من أهم الحاجات الي هـا تصقل بيها مهارات الجرو وترفع مستوي تركيزه علي الحاجه الي بتأهله عليها منذ نعومة مخالبه زي المثل ما بيقول من شاب علي شئ شاب عليه...
يعني (الطاعة) محتاجه تأهيل و (الحراسه) بجميع انواعها محتاجه تأهيل و (الشم) محتاج تأهيل و (الإنقاذ) و كلاب (المساعدة الطبية) و الي آخره محتاج تأهيل...وكل مدرب محترم صاحب علم بيتبع مدارس تدريب معينة وهم قلائل جدا في مصر ومفيش فرصة أنهم يعلمه حد لأن بأختصار محدش عنده استعداد أنه يتعلم لانهم كلهم فاهمين وعندهم الخبرة الي تكفيهم في غاواية تربية الكلاب و القصد مادي فقط لا غير (إلا من رحم ربي).
٤-طيب الكلب يبدأ يتأهل سلوكيآ و تدريبيا من عمر كام
الكلب ليتأهل سلوكيآ من يوم ولادته عن طريق الام لحد ما تقرر انك تعزل الجرو عنها و انسب وقت تعزل الجرو عن أمه هو عمر (٦٥يوم) و تبدأ حضرتك كــ مربي محترم تبدأ تأهيله تدريبيا عن طريق مدرب محترف مع أختلاف المراحل العمرية و الزمانية الي المدرب بيعملها (خطة تدريبات) علي حسب التكنيك و المدرسة الي بيشتغل بيها و الافضل أنه يكون مدرب واحد في جميع المراحل التدريبيه.
٥-طيب هل الكلب مينفعش يتدرب وهو كبير لا (ينفع جدا) الكلب يتدرب مهما كان كبير بس علي حسب الاعمار و الصحة و هياخد مجهود و وقت كتير لانه طبعا فترة عمره الي عاشها اتعلم فيها حاجات كتير جدا محتاج انك تغيرها بأشكال متعددة ممكن سلوكيا أو سيكولوجيا ومش هتاخد جميع الكفاءات الكلب الي بدأ من صغره ولسه بصحة جيدة و التدريبات بترفع مستوي لياقة الكلب البدنية مش بس مستوي الدريڤ.
يعني قصد كلام أن مفيش حاجه اسمها حصة ده خطة تدريب و برنامج ومستويات تدريب وان الخبرة لوحدها مش كفاية وان مدعين العلم أو من يطلق علي نفسه مدرب بدون علم مش كفاية الموضوع مش فلوس و خلاص أو انك تربي كلب و خلاص تدريب الكلب ده مش جزء (تــرفــيــهــي) زي محضرتك فاهم تدريب الكلب جزء أساسي من تربيتة زي الاكل و العلاج وإلا تربية الكلب تكون حرام ويسقط شرط تربيتها و أقتبس الشرط ده من الايات الكريمه في القران
(يَسْـَٔلُونَكَ مَاذَآ أُحِلَّ لَهُمْ ۖ قُلْ أُحِلَّ لَكُمُ ٱلطَّيِّبَٰتُ ۙ وَمَا عَلَّمْتُم مِّنَ ٱلْجَوَارِحِ مُكَلِّبِينَ تُعَلِّمُونَهُنَّ مِمَّا عَلَّمَكُمُ ٱللَّهُ) صدق الله العظيم
يعني شرط نعلمهم يعني ندربهم لغرض مطلوب منهم علي حسب احتياجات الإنسان المختلفة.
أتمني أن يكون الموضوع نال اعجابكم و قدرت اوصل ولو جزء بسيط عن كائن صديق و محب و رفيق للإنسان ربنا سخره لخدمة الناس
ونتمنى الدعم بالايك و المشاركه لتعم الفائدة على الجميع
